เอาหละสุมื้อนี้ขั่นสิลำความเก่ากันหลายนอลุง 
เดียวนี้คนหูสูงเขาเปิดเขาหน่าย 
หญิงลำขึ้นผัดว่าแก้มป่ายหล่ายฟ้าฮ้องฝนริน
ถามว่าเจ้านี้กินข้าวกับหยังหน่อ
มาคือโก้คือหล่อปานเทวดา 
ชายลำขึ้นผัดว่าผมนี้นากินข้าวกับแจ่ว
หยังกะฟ้อนแหน่วๆเตี้ยสาละวัน 
หน่อยกะว่าให้กันเลงเต๋เลงเต่ง
หน่อยกะว่าข่อยเก่งลำได้หลายแนว 
สอนพวกเก๊กพวกแกวจำเขามาเว้า 
มีแต่ความเน่าๆแต่ครั้งพระตา
หน่อยกะมโนราบินไปว่อนๆ หน่อยกะนางแตงอ่อนฮ้องหากุมภี
ส่วนเมืองสาวัตถีท้าวพรหมทัต
ให้ว่าจนหัวฟัดแยกซ้ายแยกขวา
หมอลำเอิ้นหาตัวลาวหลายจนหวิ่ง
หน่อยกะติ้งลิงติ่งลิงติลิงติ่ง 
อยู่บ่อยู่กะไปหาว่าลงตกขุมตกส่าง 
หน่อยกะไล่งัวต่างไปค้าเมืองไทย 
กลอนแต่ครั้งสมัยคาวศึกสามโบก
โลดบ่คิดว่าโลกเขาก้าวฮอดไส 
ท้าวสินไซกะจนหนีไปเกิด 
ท้าวสีธนกะจนหนีเตลิดไปเมืองสวรรค์
มณีจันทร์กะจนเป็นพาร์ทเนอร์
แม่นางอั้วกะจนปลูกบักเหว่อแข่งแม่ขูลู
ท้าวกาดำกะพ่อค้าหมูอยู่ทางท่าตลาด
การะเกดหนีไปอยู่โคราชแล้วห้าหกปี 
ส่วนว่านางลุนนีกับนางแตงอ่อน
ข่อยไปเห็นฮอดบ่อนลาวอยู่ลาวเซา 
มโนรากะจนเอากับแขกขายผ้าย 
ข่อยไปเห็นฮอดย่าลาวพุ้นหละแหม 
เห็นลาวนั้งขายแพรหัวเตอะหัวเติ่น 
บ่เห็นว่าลาวเซิ่นมีปีมีหาง 
บ่เห็นให้เห็นคางขอปีนำย่า
ข่อยสิบ่ได้ว่านำเขาพอแฮง


ขั่นสิลำ สิลำเรื่องผาแดงกุมตอกนางอั้ว
ท้าวขูลูเตะฮั้วเสียอกเสียใจ ไปจ้างให้สินไซ 
กุมตอกนางไอ่ ผาแดงแบกพร้าไล่ฟันถืกบักแอว
สีธนได้เมียแกวตอนออกไปรบ
มโนรานั่งนบให้มันถืกปืนตาย
จั่งแม่นเคียดแฮงหลายสีธนเจ้าซู้ 
เลยขนของไปอยู่กับท้าวกาดำ 
ตอนนั้นนางลุนคำลงไปกรุงเทพ 
กาดำสนุกเหมบกับมโนรา
ส่วนลุนนีกลับมาเตะถ้วยเตะบ่วง
เคียว่ากาดำล่วงลักเล่นเมียเขา
โทรเลขไปเอาสีธนโดยด่วน
ท้าวสีธนกะฮ่วนเคียดให้กาดำ
เคียดว่ามันมาทำขายตาขายหน้า
เมียของโตกะบ้าไปอยู่นำมันกะเลยเกิดฆ่าฟันกันขึ้นอย่างใหญ่
นางอั้วกับนางไอ่เข้าข้างนางลุน
ท้าวสีธนกะสูนกาดำเป็นเหตุ 
ชวนเท้าการะเกดกับท้าวผาแดง
ไปรุมฆ่ารุมแทงกาด่ำท้าวก่ำ
กาดำถืกเขาย่ำแล่นเข้าสวนมอน 
เห็นมณีจันทร์นอนตีนซิ่นบ่ฮี่
กะเลยโก้ยขึ้นขี้เอาซ้ำสาหยาม 
เป็นจังได๋กะตามกาดำลาวว่า
ท้าวสินไซบู๋ป่ามาพ้อพอดี
ฮ่วยนี้นางมณีเมียการะเกดคือมานอนเอ้ดเล้ดกับท้าวกาดำ
ให้กูขอเอานำกะแหน่เด้อบักเสี่ยว



#กลอนลำอีสาน #คำกลอนนิทาน อีสาน #หมอลำกลอนเดชา #ลำเรื่องต่อกลอน #คำกลอนลำ