ลำไว้อาลัยสังขาร (หมอลำอุดมศิลป์)

         ลำไว้อาลัยสังขาร (หมอลำอุดมศิลป์)

       นะโมแปลว่าความนอบน้อมถวายยอดสัพพัญญู พนมมือสาธุพุทธคุณปกเกล้า เฮาทั้งหลายขมาน้อมสรรเสริญสาธุกา 

ประนมนิ้วยอยื่น ระลึกจิตเป็นพุทธบูชาบ่เกียจคร้านใสเลื่อมศาสนา ไหว้หาคุณองค์ล้ำองค์พระธาตุพนมคำ สิ่งศักดิ์สิทให้ หลิงล่ำ 

 มาซอยซู้ซอยค้ำลำร้องให้ม่วนหู ไหว้เจ้าภูมิอยู่ในวัด ไหว้ขอสิ่งศักดิ์สิทพร้อมปกกระหม่อมจอมขวัญให้เสียงนวลยามลำส่งวิญญาณเจ้า 

  เพิ่นว่าน้อพี่น้อง โลกมนุษย์นี้มันบ่เที่ยงคือธรรมดอกพี่น้อง บุพกรรมของคนแต่งเอาบ่มีได้ ย่าเอ้ยย่า...

       สังขารปรุงมาให้ไผมันดีซั่วมีหรือจนว่านั้นสุดแท้แต่สิเป็น แม่นสิหลีกกะบ่เว้นให้ถือว่าธรรมดา อนิจจาวะตะสังขารากะดั่งกันทั้งค่าย 

      ไผบ่หมางหมายเว้นถือเป็นของธรรมชาติคาดสิได้พบพ้อบุญสร้างตั้งหลัง

      เพิ่นจั่งว่าปัจฉิมวัยเฒ่าหัวขาวฟันกะหล่อน สูงแล้วกะขาวยาวแล้วกะสั้นจั่งเห็นบั้นฮ่ำฮอน มัจจุราชแล่นข่อนใกล้หม่อจวนสิตาย 

     มรณาพยาธิจ่องเดินไปเรื่อย ไผอยากกายกวงเว้นให้ทำทานคือหลานว่า ให้ตักบาตรและหยาดน้ำบุญสิยู้สู่สบาย แม่ย่าเอ้ย...

      อยากข้าวน้ำให้ปลูกใส่พลานหิน ฆ่าความมัดสิริยัดตระหนี่เหนียวให้เหมิดสิ้น หามาได้ให้ปันเป็นสามส่วนเด้อพี่น้อง

       ส่วนหนึ่งถิ่มใส่ท้องเหวน้อยน้อยอั่งบ่เป็น ส่วนสองนั้นปันไปให้พ่อแม่ ส่วนสามให้แก่สงฆ์พระเจ้าเพียรสร้างสืบคอง