พระเวสรับขันธ์นิมนต์

พอเมื่อชาวเมืองไหว้วิงวอนเว้าค่อง  ขันนิมนต์ซ่อซ้องขอให้เข้าต่าวเมือง  คำเคืองแค้นเฮาได้จำจาก  ความโกรธกล้าเฮาสิได้ผ่อนผัน  แสนอันชาวเมืองก้มสมมายอมโทษ  เฮาผู้เป็นมิ่งบ้านใจกว้างเกิ่งพระอินทร์  พอได้ยินเขาเว้าลงยอมหมดทุกอย่าง  พรหมวิหารก่อเกื้อใจกว้างแผ่ผาย  ควรเฮาหายเคืองแค้นคืนเมือบ้านเก่า  มันหากเป็นเหล่าเฮื้อสิเมือตุ้มไพร่พล  ให้ข่อยอยู่ดีเยอฝูงสัตว์สาเนานอนค้าง  เขาวงเวระวาสถ้ำเถื่อน  ผาแผ่นล้านหลายซั้นหน่วยดอย  หอคอยทั้งสิ้นอินทร์แปลงทานทอด  ทุกหย่านฐานที่เฮาพัก  ยั้งนอนเล่นค่ำเย็นกลางเว็นเคยขึ้น  กลางคืนเคยเพียรพร่ำยามค่ำเคยหล่ำสิ่งหลิ่งเจ้าสิต่าวลา  คูหาถ้ำหนังจามรีที่เคยนั่ง  หินตั่งบ่อนเคยคาน  หินดานบ่อนเคยคู่  หินดุ้มดู้ก้อนเก่าบ่อนเคยงอย  ไผสิมาคอยหลิงเมือแลงยามแล้ง  หีนแดงทั้งหีนด้านหีนดานก้อนใหญ่ๆ  ไผสิมาหล่ำสิ่งหลิ่งเยี่ยมดังเฮานี้เด้  ให้เจ้าค่อยอยู่ดีเยอ  ฝูงแมงไม้ยูงทองฮ้องฮ่ำยามค่ำ  ฝูงหมู่ยุงและฮี้นบินแส่วสวนสน   ยามฝนฝูงแมงง่วงเรไรฮ้องสนั่น  จักจั่นฮ้องเสียงก้องทั่วไพร  ในหนห้องสายดงอนันเนก  ควายเถื่อนฝูงหมู่งัวแม่ล้านกระทิงพร้อมหมู่เมย  ตีนผาเก้ยหินแดงค้อยตลิ่ง  ทุกสิ่งฝูงหมู่หมีแฮดซ้างเสือเขี้ยวโค่งเหลือง  ฟานหมีเหมือยเหม่นเห็นลางกระฮอกด่อน  ฝูงหมู่ลิงและกระจ้อนเจียค่างบ่างชะนี  งูเหลือมลี้งูซวงเข้าสุ่ง  งูเห่าห่อมเหลือมฮ้ายแห่งหลาย  มีทั้งทำทานฮ้ายจงอางสางห่า  เต็มป่าไม้เทียวซ้นกาบเคือ  สิงดงเชื้อสิงดำเดียรดาษ  มีมากล้นคนย่ายย่อนขาม  วันนี้เฮาจักฮามไรไว้ลาไปบ้านเก่า  ฝูงหมู่พวกหมู่เจ้าให้ยืนหมั่นอยู่สู่ตัวนั้น  เนอค่อยอยู่ดีเยอ  ฝูงหมู่สะโพกน้ำบ่อนเคยอาบสรงศรี  มีบัวบานไขกาบปลีงามล้น  ประทุมทองแก้วอุบลบานพร่ำในท่าน้ำ  ตัวข้าสิต่าวลาก่อนแล้ว  ข่อยอยู่ดีเยอ  ฝูงหมู่ปูปลาแข่หอยทรายฮิมหาดกะดี  กับทั้งดุกดาดพร้อมคุณค้าวค่อเคิง  มีทั้งมังกรเกี้ยวในสระบัวลอย  ล่องหางฟาดเปรี้ยงในน้ำส่วนสน  สัปดนเล่นปูปลาหลายอย่างต่างๆ  มีมากล้นตัวข่อยสิต่าวลาก่อนแหล่ว  ค่อยอยู่ดีเยอฝูงหมู่รุกขชาติไม้สูงต่ำเลียนลำ  มีทั้งจำปีหอมดอกกะยอมยามแล้ง  แดงดวนพร้อมยูงยางขิ่นช่วย  นับบ่ถ้วนคณาไม้อยู่ไพร  วันนี้เฮาจักลาไว้ไพรสณฑ์แสนส่ำ  ฝูงหมู่ไม้ในด้าวคอยอยู่ดีแดท่อน  ค่อยอยู่ดีเยอฝูงหมู่บุปผาเชื้อมาลาดวงดอก  หอมห่วงเฮ้าบานบ้านแบ่งสี  มีทั้งดอกเกษแก้วประทุมเทศจังกร  เจียงลมเลียมสิ่งคนเลียนไว้  อันว่ามาลาแก้วหลายแนวขีนข่วย  นับบ่ถ้วนวันนี้สิต่าวลาก่อนเน้อ  บัดนี้เฮาจักลาเมือบ้านประเชไชย์แก้วกู่  เมืออยู่พู้นตอมตุ้มไพร่พล  ลาทั้งสักกุณาล้นหลายตัวเต็มป่า  กะทาข่อขุ่มเขาตู้แขกเขียว  ลางตัวขันหลายเที่ยว  ลางตัวขันมื้อสี่  นกขี่ถี่แกมหมู่แฮ้งแหลวฮ้ายผัดแห่งหลาย  นกกดแดงบินมาผ่ายซุมแซงคอก่าน  หงส์ห่านแกมเจ้าจ้องคองก้ำหล่ำหา  โกกิลาจับอยู่เทิงต้นกกกะโดนแกมนกใส่  งอยอยู่เทิงง่าไม้เสียงฮ้องส่งลาง  มีทั้งนกก่างกี้  กี้ก่างสาลิกา  นกกะทามันขันอยู่เทิงปลายไม้  สิได้ไลเมือบ้านประเชไชย์นัคคะเรศ  สิได้ตุ้มไพร่ปองครองไพร่ฟ้าเป็นเจ้าผ่านนคร  ขออย่าคำเคืองฮ้อนมาลาดวงดอก  คันแดดออกอย่าได้ห่วงเกษร  สีวอนๆอย่าได้ห่วงกาบแก้ว  บาดว่าลมพัดต้องให้บานบ้างอยู่อย่างเดิม